Gilauman nga moabot sa pito ka milyon ka tawo ang modagsa sa pagbisita ni Pope Leo XIV sa Argentina karong Nobyembre—ang unang pagbisita sa Santo Papa sa nasud sulod sa halos upat ka dekada. Sumala sa gobyerno sa Argentina, ang kataposang pagbisita sa usa ka Santo Papa sa tradisyonal nga Katolikong nasud nahitabo pa sa tuig 1987, tungod kay bisan si Pope Francis nga taga-Argentina wala nakabalik sa iyang yutang natawhan sa panahon sa iyang pontipikasyon. Ang US-born nga si Pope Leo XIV gitakda usab nga mobisita sa Uruguay ug Peru sa apostolikong panaw.
Didto sa Argentina, ang Santo Papa magpahigayon og tulo ka open-air Mass ug uban pang panagtigom sa relihiyon sa Buenos Aires ug sa probinsya sa Cordoba sulod sa upat ka adlaw, base sa itinerary nga gipagawas sa Vatican. Tungod sa kadaghan sa mga tawo nga gilauman nga motambong, nag-andam ang Argentina sa pinakadako nga operasyon sa seguridad sa ilang kasaysayan. Matod ni Security Minister Alejandra Monteoliva, bantayan sa mga pwersa sa seguridad ang tulo ka hurisdiksyon, tulo ka tugpahanan, 11 ka closed-venue events, ug tulo ka dagkong misa.
Gisusi usab sa gobyerno ang pagdeklarar og mga espesyal nga walay trabaho nga adlaw o national holidays aron mapadali ang biyahe sa mga deboto. Gitakda usab nga makighimamat si Pope Leo kang Presidente Javier Milei sa iyang pag-abot sa Buenos Aires karong Nobyembre 8, lakip na ang mga representante sa civil society.
Photo courtesy: CBCPNews
