Nanawagan ang mga economic minister sa Association of Southeast Asian Nations (ASEAN) alang sa usa ka panaghiusa sa investment promotion aron mapadali ang mga proyekto ug mapreserbar ang pagkamadanihon sa rehiyon sa mga mamumuhunan.
Matod ni Trade Undersecretary Ceferino Rodolfo, nagkatigom ang mga ministro alang sa 29th ASEAN Investment Area (AIA) Council Meeting niadtong Sabado, Sept. 19, aron bantayan ang pag-uswag sa ASEAN Regional Investment Promotion Action Plan (RIPAP) nga gilunsad kaniadtong 2024 aron i-market ang 11 ka miyembrong estado isip usa ka hiniusang destinasyon sa pamuhunan.
Gipasabot ni Rodolfo nga gihisgutan sa miting ang padayon nga pagpatuman sa mga prayoridad nga sektor sa RIPAP sama sa biofuels, medical devices, solar photovoltaic equipment, green manufacturing, ug artificial intelligence infrastructure aron mapalig-on ang value chains sa rehiyon. Nagkauyon usab ang mga ministro sa paggamit og mga hiniusang promotional materials sa mga investment promotion agencies sa ASEAN aron mapresentar ang mga oportunidad pinaagi sa usa ka hiniusang regional brand, lakip na ang pagtutok sa project readiness standards aron madugangan ang pagsalig sa mga investor.
Alang sa Pilipinas, gipunting ni Rodolfo nga makabenepisyo pag-ayo ang nasud sa RIPAP ilabi na sa mga sektor sa semiconductors, renewable energy, ug digital infrastructure, nga makahatag usab og mas dakong higayon sa mga lokal nga kompanya ug supplier nga makaapil sa regional value chains. Gikataho usab nga sumala sa United Nations Conference on Trade and Development (UNCTAD), misaka og kapin siyam ka porsyento ang foreign direct investment (FDI) inflows sa rehiyon ngadto sa $244.17 bilyon, diin ang Singapore ang kinadak-ang nakadawat samtang ang Pilipinas nakatala og gibana-bana nga $9 bilyon.
Photo courtesy: Mark Balmores I MB
