Mga KaJuander, hapit na gyud daw matapos ang panahon nga magtan-aw ta sa atong iro ug mangutana. “Brod, unsa man gyud imong problema?”
Kay usa ka Chinese startup sa Hangzhou ang mipaila og AI-powered pet translator nga matod pa makasabot sa mga tingog, emosyon ug lihok sa mga iro ug iring—ug giangkon nga moabot sa hapit 95 porsiyento ang accuracy.
Ang device isul-ob sa liog sa pet, og i-translate ang iyang mga “meow” ug “aw-aw” ngadto sa language sa tawo. Kung tinuod ni, dili na kinahanglan manghula ang tag-iya kung unsay gusto sa iro.
“Boss, gutom ko.”
“Boss, gawas ta.”
“Boss, ngano man imong gi-share ang akong litrato nga tulog ko?” Nakapahimo matod pa og kapin 10,000 reservations ang device, nga nagkantidad og 799-yuan o mga 118 dolyares.
Pero naa’y gamay nga problema. Ang kompanya wala pa makapakita og igo nga independent data o testing aron mapamatud-an ang ilang 95-percent accuracy claim. Mao nga adunay mga kritiko nga nangatawa ug mitawag niini nga “human intelligence test” imbes pet translator.
Ug kung tinuod man gani nga 95 percent accurate, unsa kaha ang nahibiling 5 percent?
Basig mao tong parte nga ang inyong iring moingon, “Wala ko nangihi sa sofa… ang iro to!”
Busa, mga pet owner, kung mopalit mo ani, ayaw kalimot: Basig dili ang inyong pet ang inyong ma-interview—kamo nuon ang ma-interview sa inyong pet.
Photo courtesy: Oddity Central
