Gipahayag sa Philippine Exporters Confederation (PHILEXPORT) ang suporta sa pagpalapad sa Bureau of Internal Revenue (BIR) sa One-Time Tax Abatement Program aron maapil ang micro-enterprises ug gagmayng taxpayers nga adunay tinuig nga gross sales nga P3 milyon hangtod sa ubos sa P20 milyones.
Sumala sa Philexport, makatabang kini sa mga gagmayng negosyante nga makabayad sa ilang daang obligasyon sa buhis ug natigom nga mga multa pinaagi sa mas ubos nga lump-sum payment.
Giawhag usab sa grupo ang mga kwalipikadong negosyante nga pahimuslan ang programa sa dili pa matapos ang deadline sa kataposan sa tuig.
Matud pa sa Philexport, ang maong tax relief makatabang sa mga negosyo nga makagamit pag-usab sa ilang pondo alang sa produksyon, teknolohiya ug pagmugna og trabaho.
Gipasiugda usab niini nga importante ang programa sa pagtabang sa gagmayng negosyo nga makabalik sa regular nga pagsunod sa ilang obligasyon sa buhis.
Photo courtesy: Philippine Franchise Association
