Gihatagan og pasidungog ang pipila ka mga empleyado sa National Meat Inspection Service (NMIS) Region 9 atol sa Employees’ Day niadtong nakalabay nga adlaw, sa NMIS Regional Technical Operations Center 9, Regional Center, Barangay Balintawak, Pagadian City.
Ang kalihukan gipangulohan ni OIC Regional Technical Director Dr. Rudio Abulencia nga gitambongan usab sa mga empleyado sa NMIS-9 lakip usab sa nagkalainlaing kaabag nga sektor.
Nakasentro sa pagsaulog ang paghatag og pag-ila sa dakong papel sa mga empleyado sa pagpalambo sa organisasyon, ilabina sa ilang makanunayon nga pagserbisyo ug pagtuman sa tagsa-tagsa ka responsibilidad.
Kabahin usab sa kalihokan ang paghatag og mga pasidungog ngadto sa mga empleyado nga nagpakita og talagsaong kakugi ug dedikasyon sa ilang mga katungdanan.
Gipasalamatan usab ni Dr. Abulencia ang mga mitambong nga partner stakeholders ilabina ang Juander Radyo Pagadian gumikan sa nahimong kontribusyon sa padayon nga paghatag sa NMIS-9 og maayong serbisyo ngadto sa publiko.
