Nasakmit sa kapulisan ang 39 ka master cases sa gituohang smuggled nga sigarilyo nga nagkantidad ug mokabat sa ₱2,234,700 sa hiniusang operasyon sa Barangay Bomba, Pagadian City niadtong nakalabay nga adlaw.
Gikasa ang operasyon sa mga personahe sa Zamboanga del Sur Police Provincial Intelligence Unit (ZSPIU), kauban ang Regional Intelligence Division 9 ug 902nd Regional Mobile Force Battalion 9.
Segun kapulisan, una silang nakadawat ug tawag kabahin sa usa ka pump boat nga gituohang nagkarga og mga smuggled nga sigarilyo apan sa ilang pagsusi wala na nila naabtan ang upat ka wala mailhing mga suspetsado nga gikatahong sakay sa pumpboat ug bugtong mga kargang sigarilyo na lang ilang naapsan.
Naglangkob ang mga nakumpiskang kontrabando ang 24 ka master cases nga white YS-brand cigarettes ug 15 ka master cases sa Red YS-brand cigarettes.
Gidala na ang mga nakumpiskang sigarilyo sa ZSPIU office alang sa dokumentasyon ug kustodiya nga gitugyan ra usab sa Bureau of Customs (BOC) Pagadian City Satellite Office alang sa hustong disposisyon.
Photo courtesy: ZSPPO-PIO
