Nagpahigayon og courtesy visit ang Iligan City Anti-Drug Abuse Council (ICADAC), ubos sa pagpanguna sa OIC Head nga si Mr. Rowel Rubio uban sa iyang mga kawani, sa Department of Justice (DOJ)-Iligan office, diin personal nalang naatubang si Prosecutor Abdul Ghaffur “Madki” Howard Alonto II.
Atol sa maong pagbisita, gihisgutan ang pipila ka importanteng agenda, lakip na ang pagpangandam alang sa Special Action Committee (SAC) on Anti-Criminality meeting uban sa City Anti-Drug Abuse Council (CADAC).
Gituki usab niini, ang mga legal nga hagit nga giatubang sa mga Barangay Anti-Drug Abuse Councils (BADACs) sa pagdumala sa mga kaso nga may kalabotan sa ilegal nga droga atol sa Drug Abuse Prevention and Control (DAPC) Week.
Tumong sa panagkita, ang pagpalig-on sa koordinasyon ug kooperasyon tali sa nagkadaiyang ahensya ug masiguro nga ang lokal nga mga inisyatiba batok sa ilegal nga droga nahiuyon sa mga sumbanan ug legal nga mga probisyon.
Nunot niini, gihatagan og pormal nga legal nga pagpatin-aw ang nagkalain-laing programa, kalihokan, ug mga giya sa operasyon sa ICADAC.
