Gipakusog sa Department of Education Davao del Sur ang pagpahigayon sa “360 Ligtas” isip kabahin sa security measures aron mapanalipdan ang mga estudyante ug personnel sulod sa matag eskwelahan.
Matud ni Joveth Tubiano sa School Governance and Operations Division sa DepEd Davao del Sur, importante ang dali nga aksyon sa mga problema sa seguridad, ilabi na sa kasamtangang panahon. Kauban usab sa DepEd ang nagkadaiyang ahensya sa gobyerno aron mas mapalig-on ang proteksyon sa mga estudyante.
Dugang ni Tubiano, ipatuman ang maong lakang sa tanang pampublikong tulunghaan, samtang gidasig usab ang mga pribadong eskwelahan nga palig-onon pa ang ilang security measures.
Gilauman sa DepEd nga pinaagi sa panaghiusa sa mga eskwelahan, ginikanan, komunidad ug mga ahensya sa gobyerno, masiguro ang luwas ug hapsay nga palibot alang sa tanang estudyante.
