Gideklara nga ubos sa State of Calamity ang lungsod sa Carmen, Surigao del Sur tungod sa grabe ug dugay nga dry spell nga gipahinabo sa El Niño phenomenon, nga misangpot sa kritikal nga kakulang sa tubig ug dakong epekto sa panginabuhian sa mga residente.
Base sa Resolution No. 381, Series of 2026 nga gipasa sa Sangguniang Bayan sa Carmen atol sa ilang ika-9 nga Special Session niadtong Setyembre 11, 2026, grabeng naapektuhan sa water shortage ang sektor sa agrikultura, livestock, mga establisemento, panglawas sa publiko ug adlaw-adlaw nga panginahanglan sa mga panimalay.
Sumala sa resolusyon, dokumentado sa Philippine Atmospheric, Geophysical and Astronomical Services Administration (PAGASA) ang dugay nga dry spell sa rehiyon nga nalambigit sa El Niño, nga miresulta sa mas ubos kaysa normal nga pag-ulan.
Gipahigayon usab sa Municipal Disaster Risk Reduction and Management Council (MDRRMC) ug El Niño Task Force ang Rapid Damage Assessment and Needs Analysis (RDANA). Nakumpirma niini nga dagkong bahin sa mga agricultural land ang nakasinati og crop damage, hinungdan sa dakong kapildihan sa mga mag-uuma ug hulga sa food security.
Dili lamang sa agrikultura limitado ang epekto sa water shortage tungod kay sumala sa resolusyon, naapektuhan usab ang livestock production, mga negosyo, public health ug adlaw-adlaw nga panginahanglan sa mga pamilya sa walo ka barangay sa lungsod.
Tungod sa deklarasyon sa State of Calamity, mahatagan og awtoridad ang Municipal Government nga gamiton ang Quick Response Fund (QRF) ubos sa Local Disaster Risk Reduction and Management Fund alang sa mga lakang sa pagtabang sa mga apektadong residente.
Lakip sa gitumong nga mga intervention ang dinaliang ayuda, financial assistance, water distribution services ug suporta sa mga mag-uuma nga grabeng naapektuhan sa dry spell.
Gipasiugda usab sa Sangguniang Bayan nga ang padayong kakulang sa limpyo nga tubig nakaapekto sa adlaw-adlaw nga kinabuhi sa mga pamilya, lakip na ang ilang panginahanglan alang sa kalimpyo, hygiene ug basic survival.
Photo courtesy: LGU Carmen
