Nadakpan sa kapulisan ang usa ka 34-anyos nga lalaki sa gihimong drug buy-bust operation sa Barangay Soriano, Tagbina, Surigao del Sur pasado alas 1:50 sa hapon niadtong Septiyembre 19, 2026.
Gipangulohan ang operasyon sa mga personnel sa Tagbina Municipal Police Station ubos sa pagpanguna ni PCPT Mark Steven Y. Sarsonas, Acting Chief of Police. Ang nadakpan giila lamang sa alyas nga “Dodong,” adunay live-in partner ug residente sa Purok 4, Poblacion, Tagbina.
Sumala sa kapulisan, narekober atol sa operasyon ang upat ka heat-sealed transparent plastic sachet nga adunay gituohang shabu, nga adunay kinatibuk-ang gibana-banang gibug-aton nga 1.5 gramos ug gibanabanaang kantidad nga ₱10,200.
Gipahigayon usab ang inventory ug dokumentasyon sa mga nakumpiskang butang atubangan sa mga gikinahanglang saksi, subay sa Section 21 sa Republic Act 9165, o Comprehensive Dangerous Drugs Act of 2002.
Gipahibalo sa kapulisan ang nadakpan sa iyang mga katungod ubos sa Konstitusyon ug gidala sa Tagbina MPS kauban ang mga nakumpiskang ebidensya alang sa hustong dokumentasyon ug disposisyon.
Photo courtesy: Tagbina MPS
