Gipusil ang usa ka 33-anyos nga babayeng buntis sa Purok Malinawon 2, Barangay Magugpo East, Tagum City, pasado alas 6:20 sa gabii niadtong Setyembre 19, 2026. Giila ang biktima sa alyas nga Jannah, temporaryong nagpuyo sa J&A Boarding House kinsa giingong naigo sa bala sa likod nga bahin sa iyang lawas.
Gidala gilayon kini sa mga personahe sa CDRRMO ngadto sa Davao Regional Medical Center (DRMC) alang sa medikal nga atensyon.
Sumala sa caretaker sa nasangpit nga boarding house kinsa giilang si alyas “Eliseo,” bag-o pa lamang miabot ang biktima sa maong lugar, ug sa wala madugay dunay usa ka wala pa mailhing lalaki ang mipusil niini sa makadaghang higayon ug dali nga mikalagiw ngadto sa wala pa matinong direksyon.
Narekober sa crime scene sa mga personahe sa Davao Norte Provincial Forensic Unit ang tulo ka empty shells gikan sa calibre .45 nga armas ug usa ka fired bullet.
Padayon karon ang imbestigasyon sa Tagum City Police Station ubos sa pagpanguna ni PLTCOL Edgardo G. Bahan, Chief of Police, aron mahibal-an ang motibo ug mailhan ang suspetsado.
Nagpahigayon na usab ang kapulisan og follow-up ug dragnet operations ug nakigkoordinar sa Davao Norte Police Provincial Office ug mga kasikbit nga police station alang sa posibleng pagkadakop sa responsable sa maong pagpamusil.
Photo Courtesy: DNPPO
