Napalgang patay ang usa ka 72-anyos nga lalaki sulod sa usa k laboratoryo sa Quirante II, Brgy. Magugpo Poblacion, Tagum City, alas 9:22 sa buntag niadtong September 20, 2026. Giila ang biktima nga si alyas “Angelito,” minyo, laborer/caretaker ug residente sa Brgy. Poblacion ning dakbayan.
Sumala sa inisyal nga imbestigasyon sa Tagum City Police Ststion, nakit-an ang biktima nga nakahigda sa salog ug adunay dugo sa palibot sa nawong, siya usab ang nagbantay sa maong pasilidad.
Mi-responde ang Tagum City PNP ug CDRRMO, apan wala na madala sa ospital tungod wala nay timailhan sa kinabuhi ang maong biktima. Napalgan sab duol sa biktima ang usa ka walay sulod nga gallon container nga adunay muriatic acid, nga gigamit sa gold assay process.
Nakita sa crime scene processing sa Davao Norte Provincial Forensic Unit (DNPFU) ang chemical burns palibot sa baba, apan walay klarong external physical injuries. Wala usab nakit-ang timailhan sa forced entry, struggle o foul play, ug intact ang personal belongings sa biktima.
Sa pagkakaron, padayon ang imbestigasyon sa kapulisan sa Tagum aron mahibal-an ang eksaktong hinungdan sa kamatayon. Dugang pa niini, gitambagan sa kapulisan ang pamilya sa biktima nga ipailalom sa autopsy examination ang lawas sa biktima alang sa saktong hinungdan sa kamatayon sa maong lalaki.
Photo Courtesy: DNPPO
