Napalgan ang mga skeletal remains o kalansay sa usa ka tawo sa Purok 25, Garinan, Barangay Madaum, Tagum City, Davao del Norte sulod sa properidad sa Hijo Resort Corporation, niadtong September 19, 2026.
Sumala pa, alas 3:30 sa hapon sa samang petsa, nakadawat og impormasyon ang Tagum City Police Station kabahin sa napalgang skeletal remains. Dali dayong gipadala ang mga personnel sa Mobile Patrol 03 aron beripikahon ang maong taho. Miadto usab sa maong lugar ang mga duty investigators aron magpahigayon og ocular inspection ug initial investigation.
Sumala kang alyas “Jeffry,” 43 anyos, residente sa Purok 25, Garinan, Barangay Madaum sa dakbayan, ala 1:00 sa hapon sa maong adlaw, samtang nangolekta siya og seashells ug mud crabs sa mangrove area, kalit niyang nakita ang mga bukog sa tawo. Iyang gipahibalo dayon ang maong panghitabo ngadto sa mga barangay authorities, nga maoy nakig-kooridnar sa kapulisan.
Miabot usab sa lugar ang mga personnel sa Davao Norte Provincial Forensic Unit (DNPFU) ug nagpahigayon og crime scene processing ug documentation.
Sa pagkakaron, wala pa mailhi ang pagkatawo sa nakit-ang skeletal remains ug gipailalom kini sa forensic examination alang sa tukmang identification ug pagdeterminar sa ubang importanteng detalye.
Human sa crime scene processing, ang mga bukog hustong gi-recover ug gidala ngadto sa Rubio Funeral Services aron ibutang sa luwas nga butangan ug saktong disposasyon, samtang gihulat ang resulta sa forensic examination ug identification.
Sa pagkakaron, padayon ang imbestigasyon sa kapulisan aron mahibal-an ang pagkatawo sa skeletal remains ug ang ubang sirkumstansya nga may kalabutan sa pagkakaplag niini.
Photo Courtesy: DNPPO
