Gidala sa ospital ang TMC Digos enforcer nga si Edwin Ayala human sa pisikal nga panaglalis nila sa usa ka pedikaber nga taga-Padada sulod mismo sa opisina sa TMC kagahapon, Sept. 18, 2026.
Matud ni Ayala, gi-impound una ang maong pedikab atol sa operasyon batok sa kolorum tungod sa mga nakitang violation. Mibalik ang drayber kauban ang iyang amahan aron bayran ang multa ug kuhaon ang unit.
Nagsugod ang panaglalis human giingong nahimong arogante ang drayber ug gitulak ang hepe sa TMC nga si Tiding Capuyan. Naigo sa ulo si Ayala ug nakasinati og kalipong, hinungdan nga gidala siya sa pinakaduol nga ospital.
Gidangop na ni Ayala sa legal office ang nahitabo ug plano siyang mopasaka og kaso batok sa maong pedikaber.
