Magpabilin sa Visayas ang expansion sa Aznar Shipping Corp. bisan pa sa plano sa Cebu-based shipping company nga mangita og dugang kapital pinaagi sa initial public offering o IPO.
Matod ni president ug CEO Kyle Alexander Aznar, daghan pa og wala matubag nga panginahanglan sa transportasyon sa rehiyon. Karon, siyam ka barko ang gipadagan sa kompanya ug adunay usa pa nga umaabot. Nagserbisyo kini sa mga ruta nga naglangkob sa Cebu, Leyte, Panay ug Negros Occidental, kasagaran sa mga biyahe nga mokabat lamang og usa hangtod tulo ka oras.
Lakip sa mga nag-una nga ruta ang Tabuelan-Escalante, Danao-Isabel, Bogo-Palompom ug Kawit-Santa Fe. Plano sa kompanya nga mag-offer og hangtod usa ka bilyong primary common shares sa IPO, uban ang overallotment option nga hangtod 100 milyon ka secondary shares. Ang indikasyon nga presyo kay hangtod P0.67 matag share, nga mahimong makahatag og gross proceeds nga hangtod P670 milyon.
Gipamahayag ni Aznar nga prayoridad sa paggamit sa bag-ong kapital ang pagdugang sa fleet. Ang plano sa shipyard ug dry-docking facility anaa pa sa unang yugto.
Sa unang unom ka bulan sa tuig, misaka og kapin doble ang kita sa kompanya ngadto sa P210.99M, samtang ang net income misaka og 155 porsyento ngadto sa P53.19M.
Photo Courtesy: Aznar Shipping Corporation
