Gitugotan si kanhi Malaysian Prime Minister Najib Razak nga ipadayon ang nahibiling sentensiya ubos sa house arrest human makadawat og conditional pardon gikan kang Malaysian King Sultan Ibrahim.
Si Najib, 73 anyos, napriso tungod sa iyang papel sa 1Malaysia Development Berhad (1MDB) corruption scandal. Gitugotan siya nga mag-house arrest hangtod Agosto 23, 2028, apan ubos sa kondisyon nga mobayad og multa nga 50 milyon Malaysian ringgit o kapin $12 milyon.
Sumala sa legal affairs division, awtomatikong mabakwi ang pardon kung mapakyas si Najib sa pagtuman sa bisan unsang kondisyon ug kinahanglan niyang balikon ang pagserbisyo sa nahabiling sentensiya sulod sa prisohan.
Si Najib una nang gisentensiyahan og 12 ka tuig nga pagkabilanggo niadtong 2020 tungod sa pagkuha sa kuwarta gikan sa kanhi 1MDB subsidiary nga SRC International.
Gikalipay sa iyang partido nga UMNO ang maong desisyon, apan si kanhi economy minister ug 1MDB whistleblower Rafizi Ramli nanawagan kang Prime Minister Anwar Ibrahim nga ipaklaro sa publiko ang detalye ug basehan sa paghatag sa house arrest kang Najib, ilabina sa mga Malaysian nga nadismaya sa maong desisyon.
Photo Courtesy: Britannica
