Gidala sa hospital ang tulo ka indibidwal human nawad-ag preno ang usa ka closed van truck ug nidasmag kini sa pader ug usa ka balay didto sa Bypass Road, Purok 17, Barangay Casisang, Malaybalay City, Bukidnon niadtong Setyembre 16, 2026 sa alas-5:40 sa hapon.
Base sa imbestigasyon sa Malaybalay Ctiy Police Station, ang truck nga kargado sa ceramic tiles naggikan sa Cagayan de Oro ug padulong sa sentro sa Malaybalay sa dihang nahitabo ang aksidente samtang nagbiyahe sa may dulhogon nga bahin sa kalsada.
Tungod sa maong mechanical brake malfunction, nawad-an sa kontrol ang 39-anyos nga drayber hinungdan nga nitipas ang sakyanan sa kilid sa kalsada ug nideretso sa konkretong pader ug sa balay nga miresulta sa grabeng pagkaguba sa istruktura ug pagkaangol sa drayber, uban iyang truck helper, lakip ang 55-anyos nga babayeng residente sa maong dapit.
Dali sab gipangdala sa Malay Emergency Rescue Unit ang tanang naangol sa Bukidnon Provincial Medical Center (BPMC) aron matambalan. Pabilin pa sab ang maong guba nga truck sa dapit nga nahitaboan samtang gihulat ang towing ug clearing operations
Hisayrang ikatulo na kining higayon nga nadasmagan ang maong balay sa dapit tungod sa kapeligro sa dalan kung agian sa dagkong truck.
Photo Courtesy: Malaybalay City Police Station
