Naka-full alert status ang Zamboanga del Sur Police Provincial Office o ZSPPO atol sa pagpahigayon sa BARMM Parliamentary Election, isip pag-amping batok sa posibleng spill-over sa kasamok gikan sa kasikbit nga rehiyon.
Sa interview sa Juander Radyo News Team, giingon ni Provincial Director PCol. Bonifacio Arañas Jr. nga gikan pa sa wala pa ang eleksyon, gideklarar na sa PNP Headquarters ang full-alert status aron mapakusgan ang pagbantay sa mga border areas, strategic locations, ug mga lugar nga posibleng agianan sa mga tawo gikan sa kasikbit nga mga lugar.
Giklaro hinuon sa Provincial Director nga wala silay namonitor nga hulga sa probinsiya, samtang andam kanunay ang mga reserve personnel ug ang Armed Forces of the Philippines sa pagresponde kung gikinahanglan.
Gipasalig usab sa opisyal nga magpadayon ang security operations ug police visibility, ilabi na karon nga nagsaulog ang probinsiya sa 74th Founding Anniversary sa Zamboanga del Sur, aron mapadayon ang kahapsay ug kalinaw sa tibuok probinsiya.
