Arestado sang kapulisan ang isa ka wanted person sa Purok Tagumpay 1, Barangay Sagasa, Esperanza, Sultan Kudarat, pasado ala-una y medya sang hapon sang damlag lang.
Ang 31-anyos nga suspek ginserbihan sang warrant of arrest sang Tracker Team sang Esperanza Municipal Police Station, kaupod ang 2nd Sultan Kudarat Provincial Mobile Force Company, SKPFC CIDG 12, kag SKPHPT HPG 12.
Ang warrant may kaangtanan sa paglapas sang Section 10-A, Article II sang Republic Act 7610, ukon Special Protection of Children Against Abuse, Exploitation and Discrimination Act kun sa diin may ginrekomendar nga piyansa nga P80,000.00.
Ang warrant gin-isyu sang Regional Trial Court Branch 19 sa Isulan sang Agosto 19, 2026.
Ginpahibalo sa suspek ang iya constitutional rights kag mga katungod sa idalom sang Anti-Torture Act antes siya gindala sa police station para sa dokumentasyon kag nagakaigo nga disposisyon.
