Gipahigayon sa Traffic Management Center o TMC Digos ang random check sa mga pedicab panahon sa buntag ug gabii, ilabi na kadtong giingong colorum ug adunay expired nga prangkisa. Matud ni Aristedes Capuyan Jr. Head sa TMC Digos, padayon ang maong operasyon aron masiguro nga legal ang mga pedicab nga namasada sa dakbayan.
Gipapilit usab og QR sticker ang mga pedicab nga kompleto ang papeles ug updated ang prangkisa aron dali kining ma-verify sa mga personahe. Giawhag usab ang mga pasahero nga tan-awon ang body number sa pedicab ug likayan ang pagsakay sa colorum. Kung adunay pedicab nga dili magpasakay o maningil og sobra, mahimong moduol sa TMC Digos aron kini maaksiyunan.
Gipahinumdoman ang tanan nga ang pagsunod sa regulasyon ug pagkamatngon sa pasahero importante aron mapadayon ang luwas ug hapsay nga transportasyon sa Digos City.
