Duha ka miyembro sa Communist Terrorist Group (CTG) ang misurender ngadto sa Police Regional Office 8 (PRO-8) atol sa managlahing anti-insurgency operations nga gipahigayon sa mga operatiba sa nagkalain-laing yunit sa kapulisan isip kabahin sa padayong paningkamot sa pagpalig-on sa kalinaw ug seguridad sa Eastern Visayas didto sa Samar niadtong Lunes, Setyembre 14, 2026.
Sa Eastern Samar, mitugyan sa iyang kaugalingon si alias “Gar,” 38 anyos, mag-uuma ug residente sa General MacArthur. Siya giila isip miyembro sa Yunit Militia nga naglihok ubos sa SRC-SESAME sa Eastern Visayas Regional Party Committee (EVRPC). Iyang gitugyan ang usa ka wala matino nga kalibre sa revolver ug tulo ka bala. Samtang sa Villareal, Samar, mibalik usab sa sabakan sa balaod si alias “Wino,” 32 anyos, mag-uuma ug kanhi miyembro sa CTG ubos sa maong grupo. Iyang gitugyan ang usa ka 9mm nga pistola nga adunay gitangtang nga serial number, lima ka bala, usa ka magazine ug usa ka rifle grenade.
Ang duha ka misurender, lakip ang mga armas, bala ug explosive, anaa na sa kustodiya sa ilang tagsa-tagsa ka facilitating units alang sa hustong dokumentasyon ug disposisyon. Giproseso usab sa mga otoridad ang posibilidad nga ma-enroll sila sa Enhanced Comprehensive Local Integration Program (E-CLIP) sa gobyerno aron matabangan sila sa ilang pagbalik sa komunidad.
Photo Courtesy: Police Regional Office 8
