Nakapa-akredit na sa Philippine Health Insurance Corporation (PHILHEALTH) ang 169 ka Yakap Gamot pharmacies sa Zamboanga Peninsula Region. Matud ni Paolo Johann C. Perez, Regional Vice President sa Philhealth Regional Office IX, ang maong ihap as of july 31 pa ug posible nga nadugangan na ang nagpa-akredit ning kasamtangan.
Segun ni Perez, mas mapadali alang sa mga kwalipikadong benepisyaryo ang pagkuha sa mga tambal nga sakop sa Yakap o sa Primary Care Benefit package sa PhilHealth.
Ang Yakap usa ka programa nga gitumong sa paghatag og mas accessible nga primary healthcare services, lakip ang mga tambal nga gikinahanglan sa mga benepisyaryo.
Pinaagi matud pa sa daghang accredited pharmacies sa rehiyon, mas daghan ang mahimong kapilian sa mga PhilHealth members sa pagkuha sa ilang mga benepisyo.
Gilauman nga makatabang kini sa pagpakunhod sa gasto sa tambal ug sa pagpalapad sa access sa healthcare services sa mga miyembro sa Philheath sa Zamboanga Peninsula.
