Patay na ang bantugang mamamahayag ug newspaper publisher nga si Eugenia Duran Apostol niadtong Septiyembre 13, 2026, sa edad nga 100. Gidayeg si Apostol sa Ramon Magsaysay Award Foundation isip usa ka maisog nga tigpanalipod sa kamatuoran ug kagawasan sa pamamahayag. Niadtong 2006, nadawat niya ang Ramon Magsaysay Award alang sa Journalism, Literature and Creative Communication Arts.
Atol sa Martial Law, nahimong kabahin si Apostol sa gitawag nga “mosquito press”, nga nagmantala og mga balita ug komentaryo nga kritikal sa diktadurya. Human sa pagpatay kang kanhi Senator Benigno “Ninoy” Aquino Jr. niadtong 1983, nagpagawas siya og espesyal nga edisyon sa Mr. & Ms. nga nagtala sa mga panghitabo hangtod sa paglubong sa senador.
Niadtong 1985, kauban nila Betty Go-Belmonte ug Max Soliven, gitukod ni Apostol ang Philippine Daily Inquirer. Nahimo usab siyang editor sa The Manila Times ug The Manila Chronicle, ug nagtukod sa Pinoy Times.
Giila usab siya sa TIME isip usa sa “Heroes of Asia.” Sulod sa lima ka dekada, nagserbisyo si Apostol isip mamamahayag ug nahimong simbolo sa kagawasan sa pamamahayag, pagpanalipod sa kamatuoran ug katungod sa katawhan nga mahibalo.
Photo Courtesy: The flame
