Gipaambit sa Kapuso actress nga si Thea Tolentino ang ilang love story sa iyang pamanhonon nga si Martin San Miguel, usa ka piloto sa komersiyal nga eroplano sa nasud.
Matod ni Thea, dugay na silang magkaila ni Martin sukad pa niadtong 2014, apan niadtong 2020 lamang sila nagkasuod ug nagsugod sa ilang relasyon. Nahitabo kini sa panahon sa COVID-19 pandemic.
Tungod sa hugot nga health protocols niadtong panahona, dili sayon ang ilang mga date. Kinahanglan silang magsul-ob og face mask ug face shield, ug limitado usab ang ilang pag-adto sa mga restawran.
Matod ni Thea, mas gipili nila nga magkita sa ilang tagsa-tagsa ka balay aron mas luwas. Usahay mag-order lamang sila og pagkaon o magluto nga silang duha.
Gibutyag usab sa aktres nga adunay dakong papel si Kapuso actor ug TV host Juancho Triviño sa ilang pagkasuod pag-usab ni Martin. Niadtong 2020, nag-double date sila kauban si Juancho ug iyang asawa nga si Joyce Pring. Human niini, namatikdan ni Juancho nga gi-like ni Martin ang litrato ni Thea sa social media, busa gidasig niya ang aktres nga maoy unang mokontak sa piloto.
Human sa halos lima ka tuig nga relasyon, mipropose si Martin kang Thea niadtong Nobyembre 25, 2025 samtang nagbakasyon sila sa gawas sa nasud.
Photo courtesy: PEP.ph
