Gipailalom na sa ikaduhang public hearing alang sa gisugyot nga ordinansa nga nagtumong sa pagpalig-on sa mga programa sa interbensiyon, rehabilitasyon ug paggiya sa mga kabatan-onan nga nalambigit sa paglapas sa balaod o Children in Conflict with the Law (CICL).
Gipangulohan ni Konsehal Thomas Derrick Siao, Chairperson sa Committee on Social Services, ang maong inisyatiba nga nagtumong sa pagtukod og mga programa alang sa Intervention, Diversion, Rehabilitation, Reintegration ug Aftercare aron matabangan ang mga kabatan-onan nga makabalik sa husto nga dalan.
Atol sa public hearing, gihisgutan sa nagkadaiyang ahensya ang paghimo og klarong Standard Operating Procedures (SOP) ug mga sumbanan sa hustong pag-atiman, pagdumala ug pagtino sa edad sa mga menor de edad nga madakpan o mahatagan og inisyal nga interbensiyon.
Gihatagan usab og gibug-aton ang pagpalig-on sa papel sa Barangay Council for the Protection of Children (BCPC) ug City Social Welfare and Development Office (CSWDO), lakip ang panginahanglan sa tukmang pasilidad ug suporta sa matag barangay.
Mitambong sa maong panagtigom ang mga representante gikan sa City Prosecutor’s Office, kapulisan, Association of Private Schools ug nagkalain-laing opisina sa lokal nga panggamhanan (LGU), alang sa paghisgot sa mga lakang aron masiguro ang hustong pagpanalipod, paggiya ug rehabilitasyon sa mga kabatan-onang nalambigit sa balaod.
