Patay nang napalgan ang usa ka security guard sa may tubohan sa Purok Paraiso,barangay klinan 6 polomolok south Cotabato pasado alas 2 sa hapon kagahapon adlawa. Giila ang biktima sa pangalang Hamid Johaini,hamtong ang pangidaron ug residente sa barangay sa Lapu sa nasampit nga lugar.
Base sa inisyal nga pamahayag ni PLTCOL) Roel V. Abejero Chief of Police sa Polomolok Municipal Police Station nga nakadawat sila ug tawag gikan sa usa ka barangay official sa barangay Klinan 7 kalabot sa pagkakita sa usa ka tawo sa maong lugar.
Gi-verify kini sa mga nagpatrolyang kapulisan ug imbestigador, diin nakumpirmang adunay usa ka lalaki nga nakasuot og uniporme sa security guard nga wala nay kinabuhi. Samtang nakit-an usab ang usa ka motorsiklo nga Honda Click nga gibana-banang 40 metros ang gilay-on gikan sa iyang patayng lawas.
Gilayon usab Gipatawag ang Scene of the Crime Operatives o SOCO aron iproseso ang crime scene ug makakuha og dugang nga ebidensiya nga makatabang sa ilang imbestigasyon. Dugang pa niini nga adunay pipila ka indibidwal nga giimbitar sa estasyon sa pulisya alang sa pagpangalak ug impormasyon kalabot sa insidente.
Matud pa sa pulis, base sa inisyal nga impormasyon gikan sa operation officer sa security agency, ang biktima unang gi-report nga didto sa Matin-ao kini nakaposting ug gikatigala nganong nakaabot siya sa maong lugar asa siya napalgan patay.
Wala pa matino sa kapulisan ang hinungdan sa pagkamatay sa security guard, samtang naghulat pa sila sa resulta sa pagproseso sa SOCO ug sa dugang nga imbestigasyon.
Photo courtesy: Polomolok MPS
