Gipalig-on sa Provincial Government of South Cotabato ang mobility ug operational capability sa kapulisan human kini naghatag og 20 ka patrol motorcycles ug 50 ka handheld two-way radios nga mokantidad og 3.63 million pesos. Ang mga kagamitan giturn-over ngadto sa South Cotabato Police Provincial Office (SCPPO) ubos sa pagpangulo ni Governor Reynaldo S. Tamayo Jr.
Gibutyag ni Tamayo nga kabahin kini sa mga panginahanglan sa kapulisan nga natala atol sa mga tigom sa Provincial Peace and Order Council (PPOC), ilabina sa pagpalig-on sa ilang lihok ug operasyon sa pagmintinar sa kalinaw ug kahusay sa probinsya.
Gilangkuban ang 20 ka motorsiklo sa napulo ka Honda ADV ug napulo ka Honda CRF, lakip ang 50 ka handheld radios. Matud pa sa gobernador, andam ang provincial government nga motubag sa mga panginahanglan sa kapulisan nga makatabang sa pagmintinar sa peace and order ug pagsiguro sa kaluwasan sa katawhan.
Dugang niini, nakadawat usab og upat ka brand-new motorcycles ang Regional Mobile Force Battalion 12 o RMFB 12, nga pormal nga gidawat ni Force Commander PCOL Samuel T. Cadungon.
Gilauman nga makatabang ang dugang nga mga motorsiklo sa pagpalapad sa police visibility, pagpadali sa pagtubag sa mga emerhensya ug krimen, ug pagpalig-on sa mga patrol ug monitoring operations.
Samtang ang handheld radios magpalambo sa komunikasyon ug koordinasyon sa mga pulis ilabina atol sa field operations ug emergency response. Gipasalamatan usab ni PRO 12 Regional Director PBGEN Alan B. Manibog si Governor Tamayo ug ang provincial government sa padayong suporta sa kapulisan.
Matud ni Manibog, importante ang panag-alayon sa lokal nga pangagamhanan ug kapulisan aron masiguro nga ang suporta gikan sa buhis sa katawhan mobalik kanila pinaagi sa mga serbisyong ilang mabati.
Ang maong assistance kabahin sa mga lakang sa Provincial Government of South Cotabato aron mapalig-on ang kahandam sa kapulisan ug masiguro ang kalinaw ug kaluwasan sa mga komunidad sa tibuok probinsya.
Photo courtesy: PLGU South Cotabato
