Dili prayoridad sa beteranang singer ug aktres nga si Lea Salonga, 55 anyos, ang pagsulod sa usa ka romantikong relasyon tungod kay mas gipunting niya karon ang iyang pagtrabaho ug pagpalambo sa kaugalingon.
Kini ang tubag ni Lea sa pangutana kon andam na ba siyang mahigugma pag-usab atol sa iyang pakighinabi sa Beyond The Exchange With Rico Hizon niadtong Oktubre 31, 2026.
Matod ni Lea, dili kini butang nga iyang gipangita o gihimong tumong sa iyang kinabuhi. Iyang gipaambit ang tambag nga iyang nakita sa internet nga mas maayong tukoron ang kinabuhi nga malipayon ug kompleto bisan walay kaminyoon o romantikong relasyon.
Gamit ang pananglitan sa usa ka matahom nga tanaman, matod ni Lea, dili angay gukdon ang mga alibangbang, kondili pagpanindoton ang tanaman aron sila mismo ang moduol.
Dugang pa niya, kon adunay tawo nga moabot ug makahimong mas nindot sa iyang kinabuhi, mahimo na niyang ikonsiderar ang usa ka relasyon. Apan sa pagkakaron, dili kini ang iyang gipangita.
Photo Courtesy: 54 Below
