Usa ka 42-anyos nga lalaki sa Siberia ang nadiskobrehan nga adunay talagsaong kondisyon human nakakita ang mga doktor og tanom nga mitubo sa sulod sa iyang mata, diin ang gamot niini nalubong og pipila ka milimetro ngadto sa tisyu sa mata.
Si Maxim Sleptsov nag-antos sulod sa upat ka bulan sa grabeng sakit sa ulo, pagdoble sa panan-aw, ug pagkapula ug paghubag sa iyang mata una pa nahibaloan ang tinuod nga hinungdan sa iyang kondisyon. Matod ni Sleptsov, nagsugod ang problema human siya naigo sa nawong sa usa ka sanga sa kahoy samtang nagbakasyon sa distrito sa Abyysky sa amihanang bahin sa Russia.
Ang sanga gikatahong direktang miigo sa iyang mata. Human sa maong insidente, gibati niya ang pangatol ug kasakit, samtang ang iyang mata nagpabiling pula ug nagtubig. Bisan pa man nga nakakuha siya og gamay nga tipak sa kahoy human niya gihugasan ang iyang mata, wala niya mamatikdi nga may nahabilin diay nga gamay kaayong liso.
Sa kadugayan, ang liso nagsugod sa pagtubo. Samtang nagkagrabe ang iyang kondisyon, si Sleptsov nakasinati og halos adlaw-adlaw nga grabeng sakit sa ulo (migraine) ug hanap nga panan-aw. Sa iyang pagbalik sa Siberia, nangayo siya og medikal nga atensyon sa usa ka pasilidad sa Yakutsk. Didto, nadiskobrehan sa mga doktor nga ang liso mitubo na, ug ang gamot niini nakalusot ngadto sa “conjunctival tissue” ang nipis nga hapin nga nagtabon sa puti nga bahin sa mata.
Matod sa pangulong doktor nga si Ivan Lutskan, ang labing makapakurat nga bahin niini nga kaso mao ang kamatuoran nga ang liso tinuod gayod nga mitubo ug ang gamot niini nakalusot ngadto sa tisyu.
Ang mitubo nga liso gikuha sa “ophthalmologist” nga si Elizaveta Karpova gamit ang dagom nga gigamit sa iniksyon. Matod niya, kini ang unang higayon nga nakasugat siya og ingon niini nga kaso sa iyang praktis isip doktor. Ang gamot nga mitubo gikan sa liso gikatahong miabot og gibana-banang 3 ka milimetro ang gitas-on una pa kini hingpit nga nakuha gikan sa mata ni Sleptsov. Sa pagkakaron, miayo na ang kondisyon ni Sleptsov. Wala na siya makasinati og sakit sa ulo, ug klaro na usab ang iyang panan-aw.
Photo Courtesy: VT
