TULO KA INDIBIDWAL SAMARAN SA PAGPANGDUNGGAB, SUSPEK NADAKPAN SA SURALLAH

Nadakpan sa kapulisan ang suspek sa pagpangulata ug pagdunggab sa tulo ka indibidwal sa Barangay Lamian, Surallah, South Cotabato, pasado alas 12:10 sa kadlawon niadtong Nobyembre 2, 2026.

Ang mga biktima nga giila sa alyas nga “Jeric,” 19 anyos; “Austin,” 27 anyos; ug “Jero,” 25 anyos, mga residente sa maong barangay. Sumala sa unang imbestigasyon, nagsugod ang insidente sa mainitong panaglalis tali sa mga biktima ug mga suspek, nga misangpot sa gubot ug pagdunggab sa mga biktima.

Samtang daling gidala sa SOCSKSARGEN General Hospital alang sa pagpatambal ang mga biktima. Ug nadakpan sa mga niresponde nga kapulisan ang usa sa mga suspek nga giila sa alyas nga “Lemi,” 37 anyos, samtang ang kauban niini nga si “Raffy” nakaikyas ug padayon pang gipangita sa mga otoridad.

Sa pagkakaron padayon ang imbestigasyon ug pag-andam sa tukmang kaso batok sa mga suspek. Gipahinumdoman ni PRO-12 Regional Director PBGEN Alan B. Manibog ang publiko, nga magpugong sa kaugalingon ug likayan ang paggamit sa kapintasan panahon sa panaglalis. Gipaniguro usab sa kapulisan nga paningkamotan nilang madakpan ang tanan nga nalambigit sa insidente.