Patay ang 11 ka bulan nga bata human nalumos sa irrigation canal duol sa ilang residensiya sa Purok Morning Star, Barangay Wali, Maitum, Sarangani Province.
Giila ang namatay nga bata nga si baby Dominic, lalaki, anak ni alyas Elvie, 42 anyos, single, self-employed ug residente sa maong lugar. Base sa report sa Maitum Municipal Police Station, nakit-an ang bata nga nalumos sa irrigation canal pasado alas-12:30 sa udto niadtong Nobyembre 1, 2026.
Dali siyang gitabangan sa ilang mga silingan ug gidala sa pinakaduol nga ospital aron mahatagan og medikal nga pagtagad. Apan bisan pa sa paningkamot nga maluwas ang bata, gideklarar kini nga dead on arrival (DOA) sa attending physician sa Maitum Provincial Hospital.
Sumala sa attending physician, acute respiratory failure secondary to fatal drowning ang hinungdan sa pagkamatay sa bata. Alas-11:40 sa buntag niadtong Nobyembre 2, 2026, personal nga mireport sa Maitum Municipal Police Station ang inahan sa bata kalabot sa insidente.
Gipadala usab sa kapulisan ang ilang reactionary team ug duty investigator ngadto sa Maitum Provincial Hospital sa Barangay Malalag aron susihon og palawman ang imbestigasyon sa gikatahong insidente.
Photo courtesy: PRO 12
