Nasamdan ang usa ka 34-anyos nga lalaki human siya giingong dunggaban sa laing lalaki sa Purok Mahirup, Barangay Malaya, Banga, South Cotabato, niadtong nakalabay nga adalw.
Giila ang biktima sa alyas nga Rem, 34-anyos, samtang ang suspek giila sa alyas nga Lex, 27-anyos, minyo ug residente sa Barangay Pandan, South Upi, Maguindanao del Sur.
Base sa unang imbestigasyon sa Banga Municipal Police Station, miabot ang suspek sa bunkhouse diin naghigda sa duyan ang biktima.
Sumala sa usa ka saksi, misulod sa kusina ang suspek ug mikuha og kahoy. Giingong duha ka beses niyang dunggaban ang biktima, nga naigo sa likod sa ulo ug sa tuo nga bukton.
Gidala dayon ang biktima sa Koronadal City Hospital aron matambalan ang iyang mga samad. Human sa insidente, misulay og dagan ang suspek apan napugngan sa mga saksi ug gitugyan sa mga miyembro sa Barangay Peacekeeping Action Team o BPATS.
Gidala ang suspek ngadto sa Banga Municipal Police Station. Matod sa kapulisan, personal nga panaglalis ang posibleng hinungdan sa insidente. Nagpadayon ang imbestigasyon sa kapulisan aron matino ang dugang detalye sa nahitabo.
Photo courtesy: Banga Municipal Police Station
