Nasakmit sa kapulisan ang gituohang shabu nga mokabat sa 10 ka gramo human madakpan ang usa ka sikad driver atol sa checkpoint operation sa Police Regional Office 12 (PRO 12) sa Purok Kintay Labangal, General Santos City, alas 5:40 sa buntag niadtong Nobyembre 1, 2026.
Giila ang nadakpan sa alyas nga “Kokoy,” residente sa Barangay Labangal, Gensan. Base sa inisyal nga imbestigasyon, namatikdan sa mga pulis nga nag-checkpoint sa National Highway duol sa DARBCI Bridge ang suspek nga nagsakay og motorsiklo nga walay headlight, side mirror ug wala usab magsul-ob og helmet.
Sa dihang gisinyasan kini sa mga pulis nga mohunong alang sa inspeksyon, wala kini motuman ug midagan hinungdan nga gilutos ug nadakpan pinaagi sa hot pursuit operation.
Sa gihimong body search, narekober gikan sa suspek ang duha ka sachet sa gituohang shabu nga adunay gibug-aton nga mokabat sa 10 ka gramo ug gibanabanang balor nga 45 mil pesos, base sa Dangerous Drugs Board o DDB.
Gidala na sa Police Station 2 ang suspek kauban ang mga nakuhang ebidensya ug motorsiklo alang sa hustong disposisyon. Giandam na ang kasong paglapas sa Article 151 sa Revised Penal Code ug Section 11, Article II sa Republic Act 9165 o Comprehensive Dangerous Drugs Act of 2002 batok sa suspek.
