Gihingusgan ni Cebu Archbishop Alberto Uy nga ang kalidad sa mga lider maoy labing importante ug dili ang gidugayon sa tuig sa termino sa mga opisyal sa barangay ug Sangguniang Kabataan kon SK maoy angay lantawon.
Kini maoy giluwatang pamahayag sa Archbishop, human gi-aprobahan sa Senado sa ikatulo ug katapusang pagbasa ang usa ka balaodnon nga nagsugyot nga lugwayan ngadto sa lima ka tuig ang termino sa mga opisyal sa barangay ug SK.
Matud sa arsobispo nga alang sa dili maayong lider, ang usa ka tuig taas na kaayo apan alang sa maayong lider, ang lima ka tuig mahimong mubo ra. Dugang ni Uy ang maong pamahayag atol sa iyang paglusad kauban sa mga pari ug mga miyembro sa relihiyosong sector sa “I Choose God Movement.”
Tumong sa maong grupo ang pagmugna og mga inisyatiba sa pagporma sa konsensya, nga nagdasig sa mga Pilipino sa pagpili sa Dios diha sa ilang personal, pamilya, propesyonal, sosyal, ug sibiko nga kinabuhi—dili lang panahon sa eleksyon.
Photo courtesy: Wikipedia
