Gihisgutan sa 21st City Council sa Cagayan de Oro ang pagsulod ug ang posibleng operasyon sa mga GSM Green taxis dinhi sa syudad atol sa ilang nga regular session niadtong Lunes, Setyembre 14.
Atol sa sesyon, giklaro ni Assistant Regional Director Mohammad Hajam Sarip sa Land Transportation Franchising and Regulatory Board (LTFRB) Region X, nga ang mga green GSM taxis nga ania karon sa syudad ania lang alang sa tuyo nga “reflection ug mapping” ug wala pa gihatagan og awtoridad nga mooperate isip mga pampublikong sakyanan (PUV).
Samtang, ang mga coordinators sa green GSM taxis gikan sa Lungsod sa El Salvador gikatakdang makigtagbo uban kang Cagayan de Oro City Mayor Rolando ‘Klarex’ Uy ug uban pang mga otoridad karong Setyembre 22 aron mas tukion pa kini nga butang.
Gipasiugda sa konseho ang panginahanglan sa husto nga koordinasyon ug komunikasyon sa tanang hingtungdan nga partido, ilabina human adunay mga taho nga pipila sa mga GSM Green taxis ang namasahero na sulod sa syudad.
Gipunting usab sa Konseho sa Syudad nga kung matugutan man nga mooperate ang mga GSM taxis sa Cagayan de Oro, kinahanglan nga mokuha ang ilang mga operator sa gikinahanglang mga permit sa negosyo sa lokal nga panggobyerno, mobayad sa tukmang buwis, ug tumanon ang tanang rekisitos nga gipatuman sa syudad ug sa uban pang ahensya sa gobyerno.
Tungod niini, nangayo ang City Hall og tabang sa LTFRB aron masiguro nga ang bisan unsang posibleng operasyon sa mga green GSM taxis mahimong husto ang koordinasyon ug pagahimuon sumala sa naglungtad nga mga balaod ug regulasyon.
Matud pa ni Sarip, ang lokal nga panggamhanan sa syudad adunay awtoridad nga mohunong o mosanta sa operasyon sa mga GSM green taxis tungod kay wala pa sila’y pagtugot nga mamasahero o mooperate sa syudad.
Photo courtesy: Cagayan de Oro City Council
