Nasakmit sa kapulisan ang mokabat sa 3,288 ka reams sa gidudahang smuggle nga mga sigarilyo nga nagkantidad og ₱3,768 048 atol sa random checkpoint operation sa Barangay Boyugan West, Kumalarang, Zamboanga del Sur, adlawng Sabado, Nobyembre 7, 2026.
Gihimo ang operasyon sa mga personahe sa 3rd Platoon, 2nd Zamboanga del Sur Provincial Mobile Force Company, kauban ang Kumalarang Municipal Police Station nga miresulta sa malampusong operasyon.
Base sa inisyal nga imbestigasyon, boluntaryong miduol sa mga checkpoint personnel ang driver sa yellow Foton delivery truck aron mangayo og tabang human siya nagduda sa kargamento nga gikarga sa iyang sakyanan.
Sa dihang giablihan ang truck, nakita sa kapulisan ang daghang kahon sa sigarilyo nga walay gikinahanglang supporting documents. Kini naglangkob sa 1,975 ka reams sa D & J cigarettes nga nagkantidad og ₱2,263,350 ug 1,313 ka reams sa Modern cigarettes nga nagkantidad og ₱1,504,698, lakip ang gigamit nga delivery truck.
Gihimo dayon ang pag-inventory sa mga nasakmit nga ebidensya uban sa presensya sa Bureau of Customs (BOC) Pagadian, samtang gidala na sa Kumalarang Municipal Police Station ang driver ug ang mga nasakmit nga butang alang sa dugang nga imbestigasyon.
Photo courtesy: ZSPPO-PIO
