Nagpahayag ug paglaum ang National Meat Inspection Service (NMIS) Region 9 nga ipadayon ug tapuson sa mga Local Government Units ang ilang mga nasugdan nang plano ug proyekto, bisan pa sa posibleng pagbag-o sa administrasyon sa musunod pang mga katuigan.
Matud ni NMIS-9 OIC Regional Technical Director Dr. Rudio Abulencia, kon adunay kabag-ohan sa administrasyon posible nga mausab ang mga prioritization projects ug may mga kahigayunan nga mabiyaan pa ang mga nasugdan nang proyekto.
Gipasiugda sa NMIS-9 ang kamahinungdanon sa pagpadayon sa mga programa ug proyekto aron mapadayon usab ang kaayohan nga madawat sa katawhan.
Gilauman usab nga dili mahimong babag ang pag-ilis sa mga liderato sa pagkompleto sa mga proyekto nga gisugdan na sa miaging administrasyon.
Alang sa NMIS-9, ang pagpalambo sa serbisyo publiko kinahanglan magpadayon bisan pa man sa pagbag-o sa administrasyon ug maseguro nga dili masayang ang mga naunang paningkamot, pondo ug mga lakang nga gihimo sa mga LGUs.
