Gipalig-on sa TESDA Davao del Norte Provincial Office ug lokal nga panggamhanan sa Panabo City ang ilang panaghiusa aron mapalapdan ang kahigayonan sa mga lumulupyo nga makakat-on og mga kahanas nga magamit sa pagpangita og trabaho ug panginabuhian.
Kini human mibisita ang mga opisyal sa TESDA Davao del Norte Provincial Office sa buhatan ni Panabo City Acting Mayor Franklin D. Gentiles aron hisgotan ang Train LOKAL o Localized Opportunities for Knowledge Access and Lifelong Learning ug uban pang programa ug serbisyo sa ahensya.
Lakip sa gihisgotan ang pagpatuman sa mga pagbansay sa kahanas nga ipahaom sa panginahanglan sa mga trabahante sa komunidad, ingon man ang pagpalig-on sa suporta sa lokal nga panggamhanan pinaagi sa mga polisiya, kahikayan ug panag-uban aron mas daghan ang makabenepisyo sa pagbansay, trabaho ug malungtarong panginabuhian.
Nahiuyon kini sa panan-aw ni TESDA Secretary Kiko Benitez nga mapadayon ang pagpalambo sa kahanas ngadto sa kahigayonan sa trabaho, ug sa pasalig ni TESDA XI Regional Director Tarhata S. Mapandi, CESO III, ubos sa baruganan nga “Train Lokal, Hire Local.”
Photo Courtesy: TESDA Davao Region
