Gipasiugda sa 10th Infantry (Agila) Division sa Philippine Army ang kamahinungdanon sa panag-alayon sa mga yunit militar aron mas mapalig-on ang ilang kaandam sa pagtubag sa mga kalamidad ug pagpanalipod sa teritoryo.
Kini atol sa courtesy call ni Lieutenant Colonel Rholdan Pagdato, Commanding Officer sa 504th Combat Engineer Battalion, kang Major General Alvin Luzon, Commander sa 10ID, niadtong Nobyembre 5, 2026, sa Camp General Manuel T. Yan Sr., Mawab, Davao de Oro.
Usa sa nag-unang kontribusyon sa 504th Combat Engineer Battalion mao ang pagtukod og temporaryong kapuy-an alang sa mga pamilyang naapektuhan sa magnitude 7.8 nga linog sa mga lungsod sa Glan ug Malapatan sa Sarangani Province.
Gipasabot usab sa ilang panagkita ang papel sa combat engineers sa pagpalig-on sa depensa, lakip na ang pag-abli sa agianan, pagpugong sa lihok sa kaaway ug pagpanalipod sa mga tropa sa panahon sa operasyon.
Gipasiugda ni Major General Luzon nga importante ang padayong kooperasyon sa nagkalain-laing yunit sa kasundalohan aron mas mapalambo ang ilang kapasidad sa pagtabang sa mga komunidad panahon sa kalamidad ug mapalig-on ang depensa sa nasud.
Photo Courtesy: 10th ID Agila Division
