Gihatagan og Plaque of Recognition si Santo Tomas Municipal Mayor Roland S. Dejesica sa Department of Education (DepEd) Schools Division sa Davao del Norte isip pag-ila sa iyang dakong kontribusyon ug pakigtambayayong sa pagpauswag sa sektor sa edukasyon.
Gihatag ang maong pasidungog atol sa kalihukang “Kinaduyawan: A Tribute to Icons of Excellence and Partnership in Advancing Transformative Education” nga gipahigayon niadtong Nobyembre 4, 2026, sa Carmen Municipal Gymnasium sa lungsod sa Carmen sa naasoy nga probinsya.
Gipasidunggan si Dejesica tungod sa iyang padayon nga suporta, maayong pakigtambayayong ug pasalig sa pagpalambo sa dekalidad, inklusibo ug mas sayon maangkon nga edukasyon alang sa tanang estudyante sa Davao del Norte.
Nagpakita usab ang maong pasidungog sa paningkamot sa lokal nga panggamhanan sa Santo Tomas sa pagpalig-on sa kooperasyon tali sa LGU ug DepEd, ilabina sa mga programa nga naghatag og mas maayong kahigayonan sa pagkat-on alang sa mga kabatan-onan.
Photo Courtesy: Santo Tomas Information Office
