Giklaro sa Bureau of Fire Protection (BFP) sa Tagum City pinaagi ni Fire Chief Inspector Esequil Tabon nga posibleng leaking sa LPG ang hinungdan sa nahitabong pagbusikad sa F1 LPG Refilling Plant sa Purok Maharlika Barangay Cuambogan Tagum City, Davao del Norte niadtong nakalabay nga adlaw.
Base sa inisyal nga impormasyon, posibleng nakapahinabo og ignition ang pag-abli sa gate sa mga trabahante nga buot unta mosulod og balik sa maong planta diin gidakop sa nag-leak nga fumes ang friction sa metal nga gate nga miresulta sa kusog nga pagbusikad.
Subay sa pakighinabi sa Juander Radyo Tagum News Team sa opisyal sa nasangpit nga buhatan, gikanayon nga mokabat sa P4.7 milyon ang structural damage sa maong insedente.
Dugang pa ni Tabon nga nagpabilin pa nga anaa sa balay tambalanan ang tulo ka mga trabahante partikular sa SPMC sanglit nakahiagum sila og 50 porsyento nga pagkasunog sa ilang kalawasan.
Samtang padayon pa sa pag-kolekta og dugang ebidensya ang awtoridad aron matino ang eksaktong hinungdan sa insedente.
