Nadakpan ang mokabat sa 36 ka indibidwal sa kapulisan sa Surigao del Norte atol sa malungtarong operasyon batok sa nagkalain-laing matang sa kriminalidad sa lungsod.
Sumala sa Surigao del Norte Police Provincial Office (SDNPPO), gikasa ang operasyon isip kabahin sa Regionwide Simultaneous Anti-Criminality Law Enforcement Operations (SACLEO).
Gikumpirma ni Provincial Director PCOL WARREN E. DABLO nga 16 ka wanted persons ang nadakpan sa 19 ka managlahing operasyon. Duha niini ang Most Wanted Persons sa probinsya. Ang tanang pagdakop gihimo pinasikad sa warrant of arrest.
Sa kampanya batok sa ilegal nga droga, nakumpiskar sa kapulisan ang 26.3387 gramos nga gidudahang ilegal nga droga nga nagkantidad og ₱199,503.16.
Subay kini sa 14 ka buy-bust operations nga miresulta sa pagkadakop sa 16 ka indibidwal. Duha kanila giila nga high-value drug personalities samtang 14 ang street-level drug suspects.
Samtang, sa kampanya batok sa loose firearms, mikabat sa 14 ka gagmayng armas ang boluntaryong gitugyan sa mga otoridad ug duha pa ang gideposito, pinaagi sa 16 ka operasyon. Usa usab ka suspek ang nadakpan may kalabotan niini.
Sa laing bahin, usa ka indibidwal ang gidakop sa anti-illegal logging operation, diin nakumpiskar ang 160.67 board feet nga kahoy nga nagkantidad og ₱20,887.10.
Gipahigayon usab ang duha ka operasyon alang sa pagpatuman sa Republic Act 10643 o Graphic Health Warning Law.
Niining operasyonha, nasakmit ang mga smuggled cigarettes nga nagkantidad og ₱8,100 ug duha ka indibidwal ang gidakop. Dugang pa, nakahimo ang kapulisan og 93 ka operasyon sa tibuok probinsya alang sa pagpatuman sa lokal nga mga ordinansa.
Mikabat sa 423 ka citation tickets ang giisyu ug ₱106,500 ang nakolektang multa. Laing 44 ka indibidwal ang gihatagan og pormal nga pasidaan ug gibuhian human sa beripikasyon.
Matod ni PCOL DABLO, magpadayon ang ilang kampanya batok sa ilegal nga droga, loose firearms, wanted persons ug uban pang matang sa kriminalidad.
Photo courtesy: SDNPPO
