Nagpagawas og pahimangno ang DPWH Cagayan de Oro 1st District Engineering Office batok sa mga indibidwal nga naggamit sa ngalan ni District Engineer Ana Lee M. Manzano aron mangayo og kuwarta ug magpa-transfer og pondo kunohay alang sa opisyal nga transaksyon.
Giklaro sa DPWH nga wala nagtugot si Manzano sa bisan kinsang tawo o entidad nga mangayo og kwarta, mangolekta og bayad o modawat og pondo alang kaniya.
Gipahimangnoan usab ang mga contractor, supplier ug negosyo nga dili magpadala og kuwarta sa personal nga bank account o dili opisyal nga payment channel kung adunay susama nga hangyo.
Gidasig ang publiko nga susihon una ang tinuod nga pagkalehitimo sa bisan unsang request ug dili maghatag og personal o pinansyal nga impormasyon.
Kung makadawat og tawag, text o mensahe nga may kalabotan sa pagpangilad, i-report dayon sa DPWH CDO 1st DEO o sa pinakaduol nga law enforcement authorities.
Photo courtesy: DPWH Region 10 – Northern Mindanao
