Giaprobahan sa Senado sa ikatulong pagbasa, pinaagi sa boto nga 13-5-0, ang Senate Bill No. 2387 nga magtakda og lima ka tuig nga termino alang sa mga opisyal sa Barangay ug Sangguniang Kabataan (SK). Tungod sa balaudnon ni Senator Francis “Chiz” Escudero, mahimong mausab ang electoral cycle ug i-oktaba ang Barangay ug Sangguniang Kabataan Elections (BSKE) gikan sa Nobyembre 2026 ngadto sa Nobyembre 2028.
Matod ni Escudero, tumong sa balaudnon nga maghimo og mas klaro ug organisadong sistema sa lokal nga pagdumala ug malikayan ang balik-balik nga pagpalangan sa barangay ug SK elections kung motakdo kini sa national elections. Apan gisupak kini sa pipila ka senador sama nila Senator Tito Sotto ug Joel Villanueva, nga miingon nga ang pagpalangan pag-usab sa BSKE mahimong supak sa Konstitusyon ug mahimong mausik ang hapit P8 bilyon nga gigasto sa Comelec alang sa pagpangandam sa eleksyon.
Nakapasa na usab sa ikatulong pagbasa ang kaparehas nga balaudnon sa House of Representatives o House Bill No. 10971. Sunod niini, pagahiuson ang duha ka bersyon pinaagi sa bicameral conference committee ug isumite sa Malacañang alang sa pirma ni Pangulong Ferdinand Marcos Jr.
Photo courtesy: Philippine News Agency
