Mga Kajuander, adunay bag-ong beauty trend sa mga lalaki nga mao ang pagputol sa ilang pilok aron kuno mas macho ug mas mahimong “alpha male” tan-awon. Kung ang mga babaye, mogasto og dako para patas-an ug pabag-on ang pilok, ang uban nga lalaki karon kay baliktad—ilang putlan ang pilok.
Nakita pa gani sa TikTok ang mga video nga ang mga lalaki nagpa-trim sa pilok sa barber shop o beauty salon, isip kabahin kuno sa gitawag nga “looksmaxxing.”
Pero mga kajuander, dili ni ordinaryong buhok nga pwede ra basta-basta guntingon! Ang pilok adunay trabaho—proteksyon na sa atong mata batok sa abog, hugaw, singot ug uban pang makairita sa mata.
Mao nga kung putlon, mahimong mosaka ang risgo sa iritasyon, impeksiyon ug discomfort. Ug pinakadelikado—gunting o blade na gani, duol pa gyud sa mata!
Imagine, gusto ka mahimong mas macho, pero tungod sa sayop nga lihok, imong mata nuon ang ma-“looksmaxx”! Ug ang eksperto nga punto: walay siyentipikong ebidensiya nga mas macho ang lalaki tungod kay mubo iyang pilok.
Busa mga lalaki, kung gusto mong mahimong “alpha male” Ayaw apila ang pilok sa inyong masculinity project.
Photo courtesy: BuzzFeed
