Dakpan ang usa ka 42-anyos nga lalaki nga giila sa kapulisan nga High-Value Individual (HVI) sa hiniusang buy-bust operation sa Hinatuan Municipal Police Station (MPS) ug Philippine Drug Enforcement Agency (PDEA) sa Purok 1A, Barangay Dugmanon, Hinatuan, Surigao del Sur niadtong Septiyembre 11, 2026.
Sumala sa report sa Hinatuan MPS, nahitabo ang operasyon alas 8:32 sa gabii, ubos sa pagpangulo ni PLT Cheryl T. Rendon, Deputy Chief of Police (DCOP), isip Lead Team, ubos sa hugot nga pagdumala ni PMAJ Nurlsan T. Muhadalam, Acting Chief of Police (ACOP), ug sa koordinasyon sa mga personnel sa PDEA Surigao del Sur Provincial Office (SDSPO).
Ang nadakpan usa ka residente sa Barangay Maharlika, Hinatuan, Surigao del Sur. Atol sa operasyon, nakumpiska sa mga otoridad ang upat ka heat-sealed transparent plastic sachets nga adunay gituohang shabu.
Ang kinatibuk-ang gibug-aton niini gibanabana nga upat (4) ka gramo, nga adunay estimated Dangerous Drugs Board (DDB) market value nga P27,200.00. Lakip usab sa nakumpiska ang buy-bust money ug uban pang drug paraphernalia.
Ang nadakpang indibidwal gipahibalo usab sa iyang mga katungod ubos sa Konstitusyon ug anaa karon sa kustodiya sa Hinatuan MPS alang sa hustong disposisyon ug tukmang legal nga proseso.
Photo courtesy: Hinatuan MPS
