Sikop sa mga personahe sa Cagwait Municipal Police Station ang usa ka lalaki human makuhaan og mga smuggled nga sigarilyo nga nagkantidad og ₱5,500.00 atol sa gipahigayon nga operasyon niadtong nakalabay nga adlaw, sa may Block 4, Purok Mahayag, Barangay Unidad, Cagwait, Surigao del Sur.
Giila ang dinakpan nga usa ka construction worker nga si alyas “Jovan”, 38 anyos, ug residente sa Purok Mondalo sa maong barangay. Ang operasyon gidumala ubos sa pagpanguna ni PCPT Chenise Llyod A. Sugian, ang Acting Chief of Police sa Cagwait.
Narekober gikan sa posisyon sa suspek ang usa ka black bag pack nga adunay sulod nga usa ka ream sa Cannon Menthol Cigarettes, usa ka ream sa Aris Cigarettes, ug lima ka ream sa Black Hawks Cigarettes. Nasayran sa kapolisan nga walay mga BIR tax stamp ug Graphic Health Warning ang maong mga produkto, ug napakyas usab ang suspek sa pagpakita og mga legal nga dokumento niini.
Gipahibalo ang dinakpan sa iyang mga katungod ubos sa batakang balaod gamit ang pinulongan nga iyang nasabtan. Kasamtangan karon nga anaa sa kustodiya sa Cagwait Municipal Police Station ang suspek alang sa saktong dokumentasyon ug pagpapahigayon sa tukmang disposasyon sa iyang kaso.
photo courtesy: Cagwait Mps
