Nagpatupad ng mga precautionary measures ang Pamahalaang Lungsod ng Cotabato mula Setyembre 15 hanggang 18, 2026, kasunod ng mga insidenteng naganap kaugnay ng kauna-unahang Bangsamoro Parliamentary Elections.
Ayon sa lokal na pamahalaan, ang mga hakbang ay isinagawa habang nagpapatuloy ang imbestigasyon at security assessment ng mga kinauukulang awtoridad, at bilang pag-iingat para sa kaligtasan ng mga residente.
Para sa mga empleyado ng pamahalaang lungsod, ipatutupad ang work-from-home arrangement sa mga tanggapan ng City Government. Gayunman, magpapatuloy ang operasyon ng mga essential services, health, emergency, disaster response, peace and order support, at iba pang frontline services.
Samantala, suspendido ang face-to-face classes sa lahat ng antas, sa mga pampubliko at pribadong paaralan. Sa halip, isasagawa muna ang asynchronous learning, habang ang mga nakatakdang pagsusulit ay ipagpapaliban at muling itatakda sa ibang araw.
Para naman sa pribadong sektor, maaaring magpatupad ang mga opisina, negosyo, establisyimento at bangko ng work-from-home, flexible, o alternatibong work arrangement, depende sa magiging desisyon ng kanilang pamunuan.
Iginiit ng lokal na pamahalaan na ang mga hakbang na ito ay pansamantala at bahagi ng pag-iingat upang mapanatili ang kaligtasan ng publiko habang nagpapatuloy ang koordinasyon sa mga awtoridad.
Hinimok naman ang lahat ng residente na manatiling kalmado, mag-ingat, at umiwas sa pagpapakalat ng hindi beripikadong impormasyon. Pinayuhan ang publiko na umasa lamang sa mga opisyal na anunsyo mula sa Pamahalaang Lungsod at iba pang kinauukulang ahensya.
Maglalabas naman ng karagdagang abiso ang lokal na pamahalaan kung kinakailangan, depende sa magiging resulta ng security assessment at sitwasyon sa lungsod.
