Mariing kinondena ang serye ng mga insidente ng karahasan na naganap sa Bangsamoro Autonomous Region in Muslim Mindanao o BARMM, na iniulat na may kaugnayan sa nagpapatuloy na Bangsamoro Parliamentary Elections.
Nagpaabot din ng pakikiramay sa mga pamilya ng mga nasawi at nasugatan dahil sa mga insidente, at nanawagan na mabigyan ng hustisya ang mga biktima at mapanagot ang mga responsable sa kaguluhan.
Binigyang-diin na malayo na ang narating ng Bangsamoro matapos ang ilang dekadang tunggalian at pakikibaka para sa karapatan sa sariling pagpapasya. Ang kasalukuyang parliamentary elections ay itinuturing na mahalagang pagsubok sa political maturity at sa hangarin ng mga Bangsamoro para sa tunay at pangmatagalang kapayapaan.
Kabilang sa mga hakbang tungo rito ang pagkakapasa ng Republic Act No. 11054 o Bangsamoro Organic Law sa ilalim ng administrasyon ni dating Pangulong Rodrigo Duterte, na naging daan sa pagtatatag ng BARMM.
Nanawagan din sa COMELEC na tiyakin ang integridad ng mga election returns at kaligtasan ng mga election personnel habang nagpapatuloy ang canvassing ng mga resulta.
Hinikayat ang mga mamamayan ng Bangsamoro na huwag hayaang masayang ang mga sakripisyong ginawa ng mga naunang henerasyon para sa kapayapaan at sariling pamamahala.
Sa huli, binigyang-diin ang kahalagahan ng pagkakaisa, kapayapaan at paggalang sa demokrasya, upang ang mga halal na lider ay tunay na maging kinatawan ng kagustuhan ng mga botante sa rehiyon.
