Motestigo si kanhi Senador Antonio Trillanes IV, Ombudsman Jesus “Crispin” Remulla, ug kapin sa 20 ka uban pang mga opisyal, kalabot sa giingong dili masaysay nga bahandi ni Bise Presidente Sara Duterte. Samtang nagpadayon ang mga proseso sa impeachment sa Senado.
Matod ni House prosecutor ug Manila 3rd District Rep. Joel Chua, andam na ang prosecution panel sa pagsusi pag-ayo sa Article II sa reklamo sa impeachment nga gipasaka batok kang Duterte ug sa iyang bana nga si Atty. Mans Carpio. Aduna silay kapin sa 1,800 ka dokumento nga magsilbing ebidensya ug nag-andam na og 25 ka posibleng mga saksi.
Gawas kang Trillanes, lakip sa listahan sa mga saksi si Ombudsman Remulla og usa ka representante gikan sa iyang buhatan ingon man ang mga opisyal gikan sa Anti-Money Laundering Council (AMLC), Bureau of Internal Revenue (BIR), ug Securities and Exchange Commission (SEC).
Tumong sa prosekusyon nga pamatud-an nga si VP Duterte giingong nakatigom og bahandi nga dili haom sa iyang sweldo ug sa kita gikan sa negosyo nga gipanag-iya niya uban kang Carpio. Gibutyag ni Chua nga gikan sa 25 ka mga saksi, 10 ka iladong mga personalidad ang unang ipresentar.
Base sa mga rekord sa panel, lakip sa mga ebidensya ang Statements of Assets, Liabilities, and Net Worth (SALNs) ni Duterte gikan sa 2019 hangtod 2024. Sa iyang 2024 SALN, gideklarar niya ang net worth nga mokabat lang sa P88.5 milyon ug “zero cash on hand” sa mga bangko. Ang pagpresentar sa mga ebidensya ug testimonya pangunahan ni prosecutor Rep. Terry Ridon sa Bicol Saro Partylist ug Atty. Chel Diokno sa Akbayan Partylist.
